އަތޮޅު ކައުންސިލްތައް އުވާލަން ރައްޔިތުންގެ މަޖިލީހުގެ ކޮމިޓީން ފާސްކޮށްފި

ރައްޔިތުންގެ މަޖިލީހުގެ ކޮމިޓީއަކުން، އަތޮޅު ކައުންސިލްތައް އުވާލުމަށް ގާނޫނު އަސާސީއަށް އިސްލާހު ގެނައުމުގެ ބިލެއް މިއަދު ފާސްކޮށްފިއެވެ. މި ބިލް ފާސްކުރެވުނީ ކޮމިޓީގެ ބައްދަލުވުމަށް ހާޒިރުވެވަޑައިގެން ތިއްބެވި 62 މެންބަރުންގެ ތެރެއިން 52 މެންބަރުންގެ ވޯޓާއެކުއެވެ.

އަތޮޅު ކައުންސިލްތައް އުވާލުމަށް ގާނޫނު އަސާސީއަށް އިސްލާހު ގެނައުމުގެ މި ބިލް ސަރުކާރުގެ ފަރާތުން މަޖިލީހަށް ހުށަހަޅުއްވާފައިވަނީ ޕީއެންސީގެ ބާރަށު ދާއިރާގެ މެންބަރު އިބްރާހިމް ޝުޖާއުއެވެ. މި ބިލް ދިރާސާކުރި މަޖިލީހުގެ ކޮމިޓީގެ މިއަދުގެ ބައްދަލުވުމުގައި ބިލް ފާސްކުރުމަށް ވޯޓު ދެއްވާފައިވަނީ 52 މެންބަރުންނެވެ. ނަމަވެސް އިދިކޮޅު އެމްޑީޕީގެ 10 މެންބަރުން ވަނީ ބިލް ފާސްނުކުރުމަށް ވޯޓު ދެއްވާފައެވެ.

މި ބިލުގައި ހުށަހަޅާފައިވާ އިސްލާހުގެ މައިގަނޑު މަޤްސަދަކީ، ކުރިއަށް އޮތް ކައުންސިލް އިންތިހާބުން ފެށިގެން އަތޮޅު ކައުންސިލްތައް އިންތިހާބުކުރަން ނުޖެހޭ ގޮތަށް ގާނޫނުއަސާސީ ބަދަލުކުރުމެވެ.

މިހާރު އޮންނަ ގާނޫނުއަސާސީގެ 231 ވަނަ މާއްދާގެ (ހ)ގެ ތިން ވަނަ ނަންބަރުގައި ބުނެފައިވަނީ އިދާރީ ދާއިރާތައް ހިންގުމަށްޓަކައި އުފައްދާ ކައުންސިލްތަކުގައި އަތޮޅު ކައުންސިލް ވެސް ހިމެނޭ ކަމަށެވެ. އަދި އަތޮޅު ކައުންސިލްގެ ރައީސްއާއެކު އެ ކައުންސިލުގައި ދެން ހިމެނެނީ އެ އަތޮޅެއްގެ ރަށު ކައުންސިލުތަކުގެ ރައީސުން ކަމަށް ވެސް ކަނޑައަޅާފައިވެއެވެ.

ނަމަވެސް، ގާނޫނު އަސާސީއަށް އިސްލާހު ގެނައުމަށް ހުށަހަޅާފައިވާ ބިލުގައި ކަނޑައަޅާފައިވަނީ ގާނޫނު އަސާސީގެ މި އަކުރު އުނިކުރުމަށެވެ. މި އިސްލާހު ފާސްވެ، ގާނޫނަކަށް ވެއްޖެނަމަ އަތޮޅު ކައުންސިލުތައް އުވިގެންދާނެއެވެ.

މި އިސްލާހުގައިވާ ގޮތުން، މިހާރު އިންތިހާބުކޮށްފައިވާ އަތޮޅު ކައުންސިލުތައް ދައުރު ހަމަވަންދެން ދެމިތިބޭނެއެވެ. މި ބިލް މިހާރު ކޮމިޓީން ފާސްވެފައިވާއިރު، މުޅި މަޖިލީހުން ފާސްކުރުމަށްފަހު ރައީސް ތަސްދީގުކުރެއްވުމުން ގާނޫނަކަށް ވާނެއެވެ.